Kuongeza wageni kwenye tukio

Orodha yako ya wageni iko kwenye kichupo cha Wageni cha kila tukio. Kila mgeni anahitaji jina na namba ya simu ili kupokea kadi. Unaweza kuwaandika mmoja mmoja, kubandika orodha nzima kwa mara moja, au kuingiza faili.

Ongeza mgeni mmoja mmoja

1. Fungua tukio lako kutoka Matukio na ubaki kwenye kichupo cha Wageni.
2. Bonyeza + Ongeza mgeni chini ya jedwali (au Ongeza mgeni wa kwanza kama orodha iko tupu).
3. Andika Jina na Simu ya mgeni kwenye mstari mpya. Mabadiliko yanahifadhiwa yenyewe.

Namba ya simu inaweza kuandikwa kama namba ya kawaida inayoanza na 0 (mfano 0712 345 678) au kwa mfumo wa kimataifa unaoanza na + na msimbo wa nchi. Shereko inaibadilisha kuwa mfumo kamili wa kimataifa ukitoka kwenye kisanduku.

Ingiza orodha ya wageni

Kama tayari una majina kwenye noti ya simu, mazungumzo ya WhatsApp au spreadsheet:

1. Bonyeza Ingiza wageni juu ya jedwali.
2. Bandika orodha yako kwenye kisanduku: mgeni mmoja kwa kila mstari, jina na simu kwa mpangilio wowote, mfano Asha Juma, 0712 345 678. Mistari yenye namba peke yake inafanya kazi pia.
3. Bonyeza Ingiza. Shereko inaongeza wageni na kukuambia wangapi wameongezwa.

Kuingiza faili, bonyeza Pakia CSV kwenye sehemu hiyohiyo na uchague faili la .csv, .tsv au .txt. Kutoka Excel au Google Sheets, hifadhi au pakua faili kama CSV kwanza. Safu yenye kichwa kinacholingana na kigezo chako cha wageni (mfano "Namba ya Kadi") inaingizwa pia.

Panga wageni wako

• Aina ya kadi: aina zilizopo ni Mtu mmoja na Watu wawili. Chagua wageni (au usichague yeyote, kwa wote) kisha bonyeza Aina ya kadi kuweka aina, au andika Aina nyingine kama "Meza ya VIP". Kadi zinaweza kuonyesha aina ya tiketi ya kila mgeni.
• Viti na meza: bonyeza Viti na meza kuandaa maeneo na meza, kisha mpe kila mgeni meza yake.
• Vigezo: bonyeza Vigezo kuongeza taarifa zako za wageni, kama Namba ya Kadi au Kundi. Kila kigezo kinakuwa safu kwenye jedwali, kiashiria unachoweza kuweka kwenye SMS, na kinaonekana kwa wahudumu wa mlangoni wakati wa mapokezi. Tumia Ongeza haraka kwa vigezo vinavyotumika mara nyingi.
• Tafuta wageni... inampata mtu yeyote kwa jina au namba, na vichujio vya haraka vinapunguza orodha kwa hali.

Hariri au ondoa wageni

Gusa kisanduku chochote kukihariri. Kumwondoa mgeni mmoja, tumia Ondoa mwishoni mwa mstari wake. Kuondoa wengi, weka tiki kwenye mistari yao kisha bonyeza kitufe cha kufuta na uthibitishe. Kufuta wageni hakuwezi kutenduliwa.

Soma safu za hali

Baada ya kutuma mialiko, kila mstari unaonyesha:

• RSVP: Atakuja, Hatakuja au Hajajibu.
• Uwasilishaji: mfano Imetumwa, Imefika, Imesomwa, Imeshindikana au Ongeza salio.
• Ameingia: kama mgeni amefika siku ya tukio.

Mistari iliyoshindikana inaonyesha Chaguo za kujaribu tena. Soma Mialiko isiyofika.

Maswali ya mara kwa mara

Naweza kuongeza wageni kupitia WhatsApp?

Ndiyo. Bot ya WhatsApp ya Shereko inakuwezesha kutuma contact cards au link ya kikundi ili wageni wajiongeze wenyewe. Wote wanaingia kwenye orodha ileile ya wageni.

Naweza kupakia faili la Excel moja kwa moja?

Lihifadhi kama CSV kwanza (kwenye Excel: File → Save As → CSV), kisha tumia Pakia CSV. Unaweza pia kunakili visanduku kutoka Excel na kuvibandika kwenye kisanduku cha kuingiza.

Kwa nini baadhi ya namba hazikuingia?

Mistari isiyo na namba ya simu au jina linalotambulika inaachwa, na namba zilizopo tayari kwenye orodha zinarukwa kama nakala. Angalia ujumbe unaoonyeshwa baada ya kuingiza.

Kuongeza wageni kuna gharama?

Hapana. Kuongeza na kusimamia wageni ni bure. Unalipa tu unapotuma ujumbe. Angalia bei.